【對沖基金經理】都說中環人是數字精，自言走到人生下半場的錢志健（Ed）也不例外。「假設有70歲命，30到40歲追求成功，40歲之後，人生只剩萬多天，會諗乜嘢叫真價值！」資深對沖基金經理自然懂得計算。今次他算準了「捍衞香港核心價值」最符合效益，「作為中環人，冇可能置身事外！」他明日與金融界友好召開首次圓桌會議，討論佔領中環的概念。
港大法律學院副教授戴耀廷拋出佔領中環核彈方案，那邊廂不同政團磨拳擦掌加入，這邊廂不斷有「權威人士」發放消息示警，倒是身處「風眼」的中環人最風平浪靜。記者在中環隨便捉了數個西裝友查問佔中為何物，得出的答案大部份都是：「係咪滙豐銀行紮營嗰班？」與Ed談起，他搖搖頭苦笑。
「我嘅朋友，正正就係你哋口中有資產、年過40歲嘅中產，最起碼佢哋對佔領中環呢個民主抗爭概念唔抗拒，願意討論，已經係好嘅起步」。都說佔中是最後一着，以癱瘓象徵本港政經命脈的中環為手段，橫看豎看，都似「蝕本生意」，最怕不穩定環境的金融業，為何要支持？ 「中環人其實唔係大家想像咁政治冷感，好似我咁，個仔2歲零9個月，做咗爸爸，為下一代，心態唔同」。
「死守不如去新加坡仲好」
「上年係我遊行次數最多嘅一年，都說This city is dying，某程度上講中咗香港嘅現況。以前你幾時聽過記者喺採訪區，會因為問中國領導人一個問題而俾人扣押？一定要有人企出嚟，捍衞香港嘅核心價值，包括言論同思想自由。好嘞，中環人最講實際，假設你唔講公平公義，長此落去，處處受制，喺度投資嘅都會諗，點解仲要喺度死守，都係家長制，不如去新加坡仲好」。
他在金融界最漂亮一仗，是四年前上證指數下跌四成，他管理的基金錄得0.54%正回報，最慘烈也是四年前，雷曼破產，他的基金戶口被凍結。贏過、輸過，走進人生下半場，他說開始思考何謂人生的「真價值」。「我嘅家喺香港，我清楚知道，我唔單止想喺呢度搵錢」。「唔係撐戴耀廷，係撐香港！」由對佔中行動「唔多上心」，到主動約晤戴，了解運動的核心概念，同意簽署意向書，他並權充聯絡人，協助金融界深入討論，「就算唔同意都好，中環人都需了解呢場非暴力公民抗命運動背後嘅意義，我知道Benny（戴耀廷）一個人做唔晒所有嘢，我希望金融界可以每月聚會一次，了解多啲先決定支唔支持，總好過一無所知」。
《蘋果》記者