中移動（941）要求政府將2016年到期3G頻譜重新拍賣，本地四大電訊商聯手反對，搵埋國際專家助拳，力證再拍賣只會推高成本，不利消費者。另一邊廂中移動高調表明參與本地3G通訊市場。究竟事件背後是否地頭蟲與紅色過江龍商戰咁簡單？
中移動乃國企，背後有國家政策支持，而香港電訊業在港英開放巿場政策下，競爭相當激烈，通話費邊際利潤下降，幸好有智能手機革命，令數據用量大增，先至頂得住。所謂大雞唔食細米，中移動紅色巨龍踩入3G市場，高價投標先推高營運成本，再進行價格戰，搶佔本地市場，所為何事？令人疑惑。眾所周知，香港中產今日多用WhatsApp、LINE，少用內地WeChat，因大家都怕奧威爾小說《1984》內，大阿哥有「叮噹隨意門」，有需要時可以睇到你嘅私人通訊！
回歸15年，北京正逐步改變由1984年起，在香港建立愛國陣線作管治核心策略，大佬自己現真身落場踢波。2012年特首選舉，北京與本地主流商界，打破過往多年合作，在大孖沙反對下捧出一個根正苗紅梁特首。此舉顯示資本家代表與共產黨長期合作關係有變，北京也不會再因為照顧本地資本家利益，勒住勒住。巨型國企殺入香港，當有國家政策在背後支持，梁振英有本事反對2016年將3G頻譜拍賣嗎？尤其是國企打着競爭有利消費者旗幟時，立法會政黨也難反對。
「愛字營」興起 溫和派反感
當本土愛國陣線如民建聯錫身，唔願打「爛仔交」咩，大佬就自己另立「愛字營」，同反對派火併，你特區政府唔肯收拾法輪功咩？大佬自有方法，用「愛字營」圍攻法輪功。大佬明知梁振英民望低，在普選問題上全無說服力，便由喬老爺披甲上陣，Tough talk由喬曉陽發表，代振英做醜人。表面上為保護特首，但客觀效果係叫佢「坐歪」。
特區政府將政治工作外判，表面可以暫時甩難，免再生火頭。但內地一套政治操作方式，與香港主流有別，如愛港力辱罵港台工會是英國走狗，此等劣質政治，只會令溫和、保守的中產也反感，客觀效果是將「愛國愛港」四字污名化，有頭有面、政見溫和保守人士，為免被視為「愛字堆」，也保持距離。如此下去，等如將過去30多年統戰工作成果倒落維多利亞港！實在愚蠢之極！
添馬男