市建局收購深水埗海壇街，引發一單煲水新聞。話說網上流傳，話喺海壇街同桂林街交界、創業77年嘅老字號信興酒樓即將結業，搞到唔少茶客心慌慌，擔心日後冇咗個竇口嘆靚茶，搞到茶樓第三代傳人羅偉賢要親自闢謠，表明繼續營業，堅持水滾茶靚。
地產搵上門游說放售
老牌酒樓啲茶究竟有幾正？原來由羅偉賢80幾歲嘅爸爸親自出馬搜購茶葉，唔靚唔入，茶芥位位6蚊。佢哋嘅半肥瘦叉燒飯更係招牌菜，就算細細碗賣30蚊，唔少茶客爭住食。搭枱兼自己攞點心嘅傳統酒樓買少見少，難怪成功俘虜街坊歡心。
做得好好哋，做乜嘢忽然傳執笠？羅偉賢估計係別有用心嘅人散佈謠言。咁啱得咁蹺喎，早前曾經有地產代理搵上門，游說佢家族出售酒樓物業、或者出租畀超市或拆細做分租舖，勁sell每個月租金有幾十萬㗎。
八方唔知呢件事同單煲水新聞有冇關，但就粗略了解過，信興同街金舖月租約14萬，有業主叫價1億放售；信興假如放盤，肯定都有價有市。之不過呢，錢唔係最重要嘅，羅偉賢話阿爺1936年創立信興酒樓，身為第三代傳人嘅佢，唔會輕易結束家族生意，叫一班茶客放心，相信班地產代理亦可死心。
mailto:[email protected]
