曾經幫前特首董建華打工嘅菲傭嬸嬸早前爆料，話老董上任後，幾乎每個月都同超人喺淺水灣香島小築別墅傾密偈。超人噚日當面否認，話冇咁嘅事，重申識咗老董好多年，咁多年去過董生深水灣屋企頂多三次。
咦……菲傭嬸嬸明明話係淺水灣別墅喎，點解超人講咗去深水灣呢？香島小築確係喺兩個灣之間嘅。
被追問到有冇去過新特首梁振英屋企作客，超人就話只係拜訪過禮賓府，仲自爆大家都有請對方食飯。超人更加伸出友誼之手，話做人要胸懷大志，唔應該同人終身結怨。
還記得舊年特首選舉當日，超人擺明車馬力撐唐唐，唔放阿爺欽點嘅狼英在眼內，𠵱家可以同後者撐枱腳，商人應有嘅圓滑之道表露無遺。