中聯辦前主任彭清華舊年忽然無聲無息告別香港，調任廣西省委書記，好多人話因為佢力推呃阿爺嘅梁振英做特首，搞到被發配邊疆小懲大戒。
下月帶幾百人訪台
實際上呢，彭清華似乎越撈越掂，事關去年底曾經接見台灣富商郭台銘嘅佢，下個月就會率領幾百人龐大代表團訪台，認真巴閉。有政界中人話呀，咪睇小彭清華嘅實力，事關佢喺香港9年，識落唔少大人物，有人形容佢係廣西最大嘅「招商招牌」，幫廣西搵到好生意。
身在廣西心在港，原來彭清華4月去完台灣，6月就會回歸香港……大家咪驚住，查實佢係率團訪港啫，相信順道都會見吓包括梁振英在內嘅老朋友啩。廠商會近日都上咗廣西交流，仲同北海市政府簽咗戰略合作框架協議，引進廠商會會員企業同其他港資到當地投資，呢啲咪彭清華厲害之處囉。