【銅鑼灣】梁烈唯噚日34歲生日，呢位壽星仔近排人氣急升，電影就拍緊葉偉民套新戲，電視當然唔在話下，下月仲要出發去北極拍無綫節目《極地狂奔》，佢要喺北極跑馬拉松，所以近日唯唯又多咗一樣事做，就係要練跑！雖然咁忙，但依然冇阻佢前晚約女友預祝生日，順便入貨出發拍節目。
入貨去北極
前晚約8點鐘，戴住紅色cap帽嘅唯唯攞住一大袋city'super嘅戰利品，喺銅鑼灣時代廣場後門等車。當時落緊雨，雨水不時打向唯唯塊面度，搞到佢皺晒眉頭，唯唯個樣仲發晒吽豆，鬼咁死悶咁！之後見佢哋一路等一路玩電話，又交換電話睇相，細聲講大聲笑，不知幾甜蜜。
當唯唯見到記者影相，佢走過嚟打招呼，仲自動報料話：「我啱啱去咗買零食同乾糧，因為下個月要去北極拍嘢，一陣會同朋友食飯，真係冇乜特別。」冇幾耐佢個司機就開住架七人車嚟接佢，車牌嘅英文字母仲係「JJ」行頭，唔知有冇特別意思呢。
採訪、攝影：徐錦池
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/