阿仙奴喺今季打得唔好，除咗肯定連續8季冇盃，連下屆歐聯入場券都唔知保唔保得住。好彩佢哋班𡃁仔爭氣，前日喺歐洲U19賽事NextGen嘅8強戰，主場贏莫斯科中央陸軍1:0；幫小兵鎖定勝局嘅，仲係只得17歲嘅新星拿比（Serge Gnabry）㖭！
英超球會喺今屆經已第2屆舉行嘅NextGen Series（明日之星系列賽），表現相當之好，車路士同埋阿士東維拉率先入咗4強。前日喺阿聯酋球場，有希頓、夏路域同拿比等小將在陣嘅阿仙奴，就同俄羅斯嘅莫斯科中央陸軍爭入4強，結果憑拿比喺56分鐘射入致勝球，最終以1:0晉級；小兵周五就會喺意大利科莫湖嘅4強賽，同車仔合演英超內訌兼倫敦打吡。同日另一場4強戰，就由維拉對葡萄牙嘅士砵亭；如果唔係士砵亭喺8強踢走熱刺，英超就會包辦全部4強席位。
歐洲U19賽闖4強鍊車
唔講你唔知，喺2011年由德國史特加以10萬鎊加盟嘅德國小將拿比，今季都幫阿仙奴嘅A隊上過陣，加加埋埋仲踢咗4場；而舊年10月，佢喺作客輸畀諾域治0:1場英超都有份打，仲成為繼韋舒亞同埋法比加斯後，兵工廠史上第3位最年輕嘅英超球員。阿仙奴預備組同主要發展部教練布頓賽後話：「拿比展示出佢嘅級數。佢嘅位置感、走位同埋把握力都係一絕。」講到對車仔嘅4強戰，布頓就咁講：「我哋今年喺U18或U21賽事都冇受過真正考驗，而車仔係支頂級球隊，所以我哋好高興可以同佢哋交手。」
阿仙奴今季表現差，肯定四大皆空之餘，餘下時間仲要同車仔、熱刺爭兩個歐聯席位；家陣佢哋班師弟，總算喺NextGen幫佢哋同埋球會爭番啲面子。我求大俠亦希望有朝一日，可以喺英超見到呢班小兵落場比賽啦！