【上市公司主席】約盧先亞談佔領中環，先要過公關大員一關。「佢哋好擔心呀；就嚟公佈業績嘛，唔知我會講啲乜，差啲想跟住我嚟」。盧先亞最終單刀赴會，明確表態支持佔領中環；但上市公司主席的身份，卻令他不能參與；就連受訪也不能露真身。中環人撐佔中？矛盾是必然。
英國品牌Paul Smith西裝配Duchamp花恤衫，腳踏意大利漆皮皮鞋；閒時在報章撰寫評論的盧先亞，上周暫時撇下公關大員，由中環的辦公室單拖走到遮打花園外受訪。
望着眼前的中環滙豐總行及舊立法會大樓，這位上市公司主席別有一番滋味在心頭。「由88直選到𠵱家，呢25年到底我哋有乜嘢進步？」
「要諗吓係咪辭職去做」
97回歸前一刻，他在立法樓大樓外揮手送別一班落車議員，以為一個時代的終結，代表特區一個新開始，事實卻是回歸16年，香港自由與民主空間不斷收窄，核心價值褪色，北京承諾的2017年普選，至今仍然「走數」。「我唔係覺得普選可以解決一切問題，但至少覺得：香港值得更好」。
愛跑馬拉松的盧先亞，覺得特區政改猶如香港渣馬：「香港嘅馬拉松唔係渣，不過比起其他地方差啫。你出去睇過，你就知道香港真係雞吖嘛……你有咁嘅財力、資源同條件，冇理由辦個咁嘅嘢就要我哋收貨」，「可能係因為田總（主辦者）最緊要有贊助，渣打最緊要個名叫渣馬唔好叫港馬，香港政府呀：哦，OK喎，最緊要唔好死咁多人就得……大家都唔係用一個市民可以喺呢件事裏面、有最大得着嘅心態去做」。
當溫文爾雅的學者也起義，紅燈已亮起；中環人也支持佔領中環，「咁強烈嘅態度，係要令當權者又好、建制派又好，都會覺得：喂，今次嚟真喎……你唔好恰我哋、唔好耍我哋、唔好呃我哋」。
佔領中環等同癱瘓中環？盧先亞對此忿忿不平：「每一年打風，嗰幾日可能停市、交通又停，咁香港係咪癱瘓咗？係咪已經去到萬劫不復嘅地步吖？」他強調中環屬於全港市民，「如果市民話要攞中環做據點、作為一種標誌、作為一個發聲基礎，點解我哋唔可以咁做呢？」
激動過後，卻要回歸現實。作為上市公司主席，他支持之時不便參與。除非……「如果我聽日退休，我一定參加……我都要諗吓：係咪真係要辭職去做」。
《蘋果》記者