網購堀起將傳統銷售趕入絕路！近日有報道指，布里斯本一家食品雜貨店貼出告示，向齋睇的顧客收費41港紙，阻止客人「混完吉」後幫襯網店，有買嘢者，41蚊就自動扣除。店主解釋，就算產品價錢一樣，或佢哋獨家發售，客人都冇幫襯。睇表面證據，咁多客混吉間舖都好有問題，有網民不忘串嘴「佢梗係癲咗唔想do！」
傳統零售舖學茶仔淨飲雙計，近年越嚟越多，早在兩年前澳洲一間滑雪用品店，眼見網上瘋狂減價，啲客入嚟混吉試鞋，最終焗收50澳紙。網店唔使畀舖租可以平啲賣，傳統商販計埋燈油火蠟，注定賣得貴啲，就算多做啲value added，客人照樣流失。
就算產品幾獨特都好，網上抄襲速度極快，過幾日就獨家不再。好似港女超恨的Vera Wang，其上海旗艦店近排傳話客人若果唔買嘢，要畀3,000人仔試穿費，「為了保障智慧財產權」，所以混吉雙計的例子將陸續有來！
Samantha
本欄逢周三、五刊出