踏入5月，又係大專畢業生搵工高峯期，空姐同空少係唔少畢業生夢寐以求嘅工作。國泰航空招聘經理Sabrina話呀，過去唔少應徵者面試時，都話睇完無綫電視劇《衝上雲霄》而想入行，但佢提醒應徵者，見工前最重要做足功課，否則好易被叮出局。
好似分組討論咁吖，最忌過火地爭取自我表現，例如人哋未講完就插嘴嘅話，肯定失分。大家咪以為，靚女靚仔就會加分，若然英文唔夠流利，一樣被out。試過有靚女因英文唔夠班，後來積極惡補，四年內應徵八次先夢想成功。
國泰每年約收2萬封應徵空中服務員嘅申請信，今年則會招聘500個位。佢哋噚日安排IVE工商管理系航空與客運服務高級文憑嘅畢業生參加工作坊，了解空服員工作性質同面試攻略。