為咗九龍塘李惠利塊地皮，浸大校長陳新滋年初揚言，攞唔到塊地皮做中醫院就劈炮唔撈，但係政府企硬，更打算用嚟建豪宅，陳新滋辳爆收場。爭地風波爭議大，浸大校董會新主席鄭恩基噚日出席校慶酒會，卻詐儍扮懵，話唔知道陳新滋以辭職做籌碼：「我冇聽過喎！」企喺旁邊嘅陳新滋強調，自己講過會算數。
浸大同政府關係跌到冰點，噚日57周年嘅校慶酒會，一個官員都唔見。陳新滋話，酒會只係想感激過去對浸大捐款嘅人。可能陳新滋唔係做咗浸大校長好耐，查實浸大昔日校慶酒會，都有高官出席，點解今年唔請官員、或者點解冇官嚟，大家心照。至於會否支持學生佔領中環，兩人都話，唔講同酒會冇關嘅嘢。