民主黨主席卿姐噚日重出江湖，重新主持舊年5月起停播嘅網台節目《議會內外》，以後逢周五都會播出半小時。由於卿姐嚟緊要參加立法會韓國環保團，有一段時間唔喺香港，所以噚日順勢錄埋第二集，仲請咗佢稱為「阿妹」嘅工黨何秀蘭做嘉賓。
卿姐遇到前綫好姊妹勁好傾，半小時節目話咁快錄完，其間最令兩人笑爆嘴嘅，係經民聯林健鋒上周誤傳聖旨，要全國人大法律委員會主任委員喬曉陽喺傳媒面前即場更正一事。卿姐話，事後睇番喬老篇發言，其實同林健鋒所講意思相若，若果當日自己在場，一定即場舉手指正番喬老，攞番少少做人應有嘅尊嚴咁話喎。