前晚套《女警愛作戰》，除咗謝天華穿越時空鼻下有白色粉末寸超盈之外，原來網民仲睇到好多穿崩位，家陣有咗高清電視之後，網民捉穿崩越來越多，TVB真係要諗吓對策啦！
《女警》朱慧敏係交通警長，佢制服上面No.係39213，而06年郭少芸喺《學警出更》入面係分區報案科警長，號碼同樣係39213，制服重複用，其實都無可厚非嘅，一來環保，二來都有網民話，堆編號係專畀TVB拍劇用嘅，但唔同部門係咪著同一套制服?呢啲就要問吓專業人士啦。其實之前《法網狙擊》陳敏之張証件寫住「只作道具之用」，No.仲係12345添。
不過前晚劇情講成班男警察叫王君馨一個人留守唐樓，就真係無可能啦！真實情況係點都有個男伙記傍住嘅！所以智雯BB今次鬧錯人啦!而警車上面，又有網民CAP圖，見到部電腦張Wallpaper寫住「XX集團」，而唔係雞乸咁大隻警察Logo，唔知咩集團咁緊要呢？