黎明舊年10月宣佈同樂基兒離婚，四年夫妻情一刀兩斷，想當年佢哋喺2000年合拍和記電話廣告結緣，當時黎明唱嘅廣告歌係《Can't take my eyes off u》，歌名完全唱出佢嘅心聲──眼睛離唔開樂基兒，𠵱家佢哋夫妻緣盡各行各路，咁啱黎明噚日出新歌《我可以忘記你》，一樣咁應景。
呢首係黎明失婚後第一隻歌，歌詞鬼咁到肉：「付出的受傷的通通都是你，自私的殘忍的似乎只有我，可惜我並不難過，我僅存的失落，是再不怕寂寞，想見的不見的都失去聯絡，剩下的多餘的都不要再說，得到的已經太多，你安然去生活，我安靜來存活 沒有愛過你，我最愛是自己……我可以忘記你，不怕想起，才算是勝利」。
舒淇微博呼應
黎明鍾意玩憑歌寄意，舊愛舒淇同樣愛喺微博抒發感情，前日舒淇喺微博擺咗張素顏相，留言：「也許，一個轉身，原本如此熟悉的兩個人從此永不相見，形同陌路。這世上沒有誰會永遠是誰的誰，有的人註定只能被傷害，有的人註定只能錯過，有的人永遠只適合活在另一個人的心裏。」竟然同黎明嘅新歌互相呼應，佢哋咁心有靈犀，難怪傳復合啦。
撰文：馮仁昭
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/