一位90後在面試講座中問我，他們這一代搵工面試最大的弱點是甚麼？我不假思索即答「冇heart」！
他們這一代置身於資訊氾濫的年代，真正足不出戶，能知天下事。例如想睇Mona Lisa不過冇錢去巴黎，只需click入羅浮宮網站，即時3D顯示眼前，大把時間慢慢欣賞。但如此方便又如何？奈何就是無心學習！搵工時情況一樣，要知公司業務背景、老闆是何許人馬，只要肯花幾分鐘時間上網一查，總會有多少頭緒，理應在申請工作前做好資料搜集，覺得有興趣或合適才申請。怎可能到了面試時還一無所知，以致手足無措？
工作有很多種，但歸根究柢最緊要肯用心學、肯盡力做。只怪社會太富庶，父母愛子女照顧得太無微不至，年輕人總是漫不經心，完全沒有做過思想心理準備，好迎接出來社會打拼所需克服的種種困難及挑戰，結果傷亡慘重。
講到面試更加激氣，我講過無數咁多次，面試官或者僱主所有提問不管如何包裝，拆解開來都只是兩條，就是「點解要請你？」和「點解選擇這份工」。明知一定問，還是不準備，擺明冇心做。換句話說，肯請的，只能是同樣冇心兼求其貪方便的僱主，試問他們怎會花時間栽培你？結果肯定怨聲載道，一邊返工，一邊投訴；僱主繼續闊佬懶理，榨得幾多得幾多。
一個擺明搵人笨，一個明搵自己笨，誰比誰更笨？
張慧敏
http://www.facebook.com/HKcareerdoctor