【旺角】資深大律師胡漢清（Alan）嘅媽咪莊永楚（Linda）為咗向阿仔追番2千幾萬家產，專登喺加拿大返港搵仔，前幾日佢開完記者會後，夜晚阿仔終於肯同媽咪食飯，可惜全程冇望阿媽一眼，搞到老人家鬼咁激心！
胡老太都唔知幾時可以攞番呢筆血汗錢，所以佢暫時都要留喺香港等運到，大前日下晝5點幾，胡老太就喺姪女等人陪同下，去咗旺角嘅7仔買手機增值卡，攞咗一百蚊出嚟增值，佢仲去雜誌架前面流連咗一陣，唔知係咪睇吓有冇佢單新聞呢。
搭的士撇甩記者
之後胡老太就同姪女去旺角繼續濕平，雖然胡漢清畀佢嗰兩張金卡仲用得，但胡老太就好知慳識儉，入咗專賣平民價貨物嘅日本城行咗一圈後，再去一間舊式雜貨店慢慢睇，其間胡老太專睇竹製枱墊，佢攞上手同姪女講：「全部都係中國造。」最後胡老太買咗張枱墊之後離開。
冇幾耐胡老太佢哋發現有記者追訪，就即刻走去截的士走，由旺角經土瓜灣、紅磡、觀塘、九龍城、何文田兜大圈，帶記者遊花園，最後佢哋喺apm落車，然後消失喺人堆中，成功撇甩追訪。
採訪、攝影：徐錦池、楊浩賢
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/