董建華生於大家族，係已故船王董浩雲個仔，有一個細佬三個妹，膝下仲有兩子一女、九個孫。Sonia話，老董大時大節都會一家人嚟淺水灣別墅聚會，相當溫馨。咁喺工人眼中，邊位家族成員對工人最好？答案原來係大少董立均（Andy，圖），Sonia話佢為人親切，成日都會同工人打招呼。
至於最鍾意叫人「洗手」嘅董太趙洪娉又點？Sonia話佢都係好人一個，唔係外界所講咁難應付。佢話董生董太最鍾意食簡簡單單嘅中國菜，蒸吓魚炒吓菜就夠。
Sonia話，董生董太係佢首任僱主，對佢算係唔錯，因為菲傭喺香港法定月薪3,000幾蚊，董生董太就畀月薪4,600蚊，農曆年利是有500蚊，算係唔話得，身邊唔少朋友都好羨慕。雖然董生好，但Sonia話都唔及佢之後嗰任僱主，對方視佢如屋企人，所以一做就12年，莫非老董唔係咁對佢？