外傭爭取居港權敗訴，但無阻大批外傭繼續留港打工，八方噚日喺搵外傭嘅網站見到曾為前特首董建華打工嘅菲傭Sonia都搵緊工。今年61歲嘅Sonia，曾於94至99年服侍老董，見證住老董點樣榮登特首寶座，好清楚董家上下各人嘅脾性、封利是有幾大方……佢仲透露老董當年同長實集團主席李嘉誠，差唔多個個月都有聚會㖭！睇嚟當年老董同首富嘅官商關係，真係何其融洽！
當年Sonia負責看守董建華喺淺水灣嘅香島道52號香島小築別墅，Sonia話，老董每逢招呼親朋戚友先會現身別墅，其中一位貴賓就係長實集團主席李嘉誠。
Sonia話，老董做咗特首之後，同首富幾乎每月會面一次，有時食早餐，有時食午飯，雙方見面時，都係單對單傾密偈，絕無外人。雙方關係有幾好，真係唔難想像。唔怪得首富喺老董任期未屆滿時，已提早3年公開支持佢連任啦。
陳方安生好cute
點解老董前外傭會咁記得首富呢？梗係啦，Sonia話因為每次首富嚟，都會放低1,000蚊利是，最多試過畀2,000蚊，別墅6個工人就會平均分咗佢，所以佢哋班工人個個月都好期待「李董會」。
仲有邊個會嚟別墅？Sonia話，原來政務司前司長陳方安生（Anson）都會嚟，讚佢笑容十足好cute，仲同佢握過手㖭。
mailto:[email protected]