上個禮拜證監會主動要求一間由外國人做老闆嘅小型證券行莎利士堡停業，馬上令市場憂慮係咪個市唔掂，搞到啲細行爆煲。有老友記仲話，證監會至今都冇好清楚交代叫停莎利士堡嘅原因，令人覺得間行牽涉嘅問題可能唔係咁簡單。話口未完，噚日港交所（388）又公佈，一間叫景高亞洲嘅參與者自動離場，翻查資料，呢間景高嘅持牌人全部都係外國人，唔通呢排班外國人水土不服？
據聞景高係來自芝加哥嘅高頻交易商，主要處理本地同日本嘅交易，對本地影響未必好大。其實上星期都有外國報章報道咗景高要「摺埋」，又話佢哋早前收購咗另一間美資行，好多交易交畀呢間行做。講開又講，港交所斥巨資響堆填區起數據中心，有唔少行家認為其中一個原因係想推動高頻交易（小加總裁否認過好多次），家陣有高頻交易商撤退，唔知小加總裁點睇呢？