買衫扮靚同投資一樣，揀啱style襯得靚，方向正確，形象自然UP！國家主席習近平夫人彭麗媛就係好例子。
彭麗媛首次跟習近平外訪莫斯科，以Royal blue乾濕中褸配深色絲襪，加埋條淺藍色圍巾做highlight，雍容大方唔浮誇，成功擺脫中國「第一夫人」老土嘅形象。
彭麗媛呢身行頭，出自你同我都唔識嘅國產品牌「例外」。經佢「代言」，不但令品牌大熱，噚日國產服飾A股全線炒到癲，有股份更漲停板。
菲菲認為彭麗媛今次出場，更大意義係軟性撐老公。佢唔靠LV、Chanel等名牌都令人眼前一亮，仲帶領潮流用國產貨，你估下面班官太以後會點？「你還穿Chanel嗎？我穿的是第一夫人的『例外』！」
仲買外國名牌？實俾其他阿太話你out啦！於是彭成功軟銷國產貨，減低奢侈品需求。至於習總就繼續以強硬手法反鋪張。一剛一柔，互相配合，以後奢侈品喺強國睇怕運滯啦。
Fifi
本欄逢周二、四刊出