港隊署理總教練金判坤上周五響亞盃外，帶領港隊主場勇挫越南；休息兩日，噚日朝就帶住香港23歲以下代隊（上圖紅衫）同太陽飛馬拍跳，結果淨吞兩蛋。金sir賽後就話，效力南華嘅積施利已經攞到特區護照，而佢希望正申領緊特區護照嘅安基斯等，可趕及10月主場對阿聯酋候命。
港隊在亞盃外踢咗兩場有4分，而足總亦準備同金sir傾新約，等佢盡早升正，但佢噚日話未聽過足總同佢傾新約嘅消息；港隊方面，金sir話距離下場比賽有成半年，如申請轉籍嘅科夫、法圖斯同安基斯趕及，對調動有幫助。佢話：「港隊目前中後場陣容相當可靠，只係進攻相對較弱，如前線有高梵同安基斯等快馬，配合陳七同麥基等，無論調動同攻力都有幫助。」另外，唔少球迷近期熱話，係認為港隊留響較細嘅旺角場對阿聯酋有着數。足總董事伍健就話，兩個場嘅大細其實差無幾，亦可畫窄界線，總之符合國際標準就得。金sir笑言，韓職好多球會對強隊都會劃窄啲個場，至於場波響邊度踢，可能要等多陣先明朗。