香港普選係乜貨色？大家早應心裏有數，類似伊朗模式，共產黨同神權國家冇乜大分別，都係永遠執政，一個永遠執政的政權，又點會容許特區有真普選，選出一個非執政黨屬意的首長呢？
假普選已無懸念，而香港亦只會在三不像的政治體制下，由庸才執政，內部矛盾頻生，管治質素不斷下跌。其實，港人治港最大失敗，係制度上失敗。過去15年執政者一樣是符合中央「愛國愛港」標準，司局長亦如是，但點解越搞越低劣呢？愛國愛港陣營中人，靠北京用溫室培植方式製造出來，人辦如民建聯李慧琼，城規會、行政會、立法會公職銜頭一堆，但在中產及意見領袖眼中就係一個庸才，靠阿爺幕後援助才有今日。就算2017年提名委員會選出兩人參加直選，畀李慧琼同劉江華你揀，在酸橙總比爛橙好邏輯下，巿民選出李慧琼，佢一樣欠真正民意授權，執政後無法將分散之權力集中起來推動施政。
屆時泛民亦會發動杯葛運動，呼籲選民唔去投票，杯葛選舉，政治對立程度比2012年小圈子選舉更甚。因為2012年泛民主流仍然積極投入小圈子選舉，包括選委選舉，客觀後果係令香港人接受了呢套制度。若果2017年比2012年更倒退，泛民在提名期已被篩走冇得玩，下一步就只有全力動員杯葛選舉，令投票率低過五成，新特首上台處境比梁振英更衰。
庸才執政 香港冇運行
有人認為只要中央派黃仁龍、林鄭月娥等政治色彩較小，又有民望及管治經驗者出選，自然可爭取到選民支持，提升選舉認受性。問題是在假普選制度下，有能力之士會心甘情願去玩呢個「有辱無榮」遊戲嗎？一旦參選將受泛民攻擊，加上「梁振英陰影」，令有地位、有頭有面者怕咗所謂「建制內良性競爭」，擔心在選委提名期已負面宣傳滿天飛，人格被謀殺，仲要去面對普選拉票，真係人都癲。有能力而愛惜羽毛者，自2012年特首選舉後就絕不會再發特首夢。
最後，在以共產黨領導愛國愛港陣線初選勝出之兩人，只會是建制內平庸政客，而得票比立法會超級區議會代表何俊仁、馮檢基更低，呢個就係通輸局。
北京表面上贏，實際要繼續背負香港廢柴特首呢個政治包袱，建制中人勝選，但冇認受性，施政寸步難行，泛民亦只有做更徹底的反對派。香港人，只有採取群眾運動方式去表達不滿。
回歸20年，到2017年設計出來的，仍然係一套無法有效運作的政治制度，香港仲邊有運行！
添馬男