珠江鋼管（1968）主席陳昌唔單只做喉管做得叻，原來養錦鯉都有一手。佢愛女陳兆年同華華講，爸爸舊年憑一條叫「西施」（圖）嘅日本昭和三色錦鯉，先後拎咗中國賽、亞洲賽同日本全國錦鯉大獎，榮登世界冠軍咁巴閉。
已經65歲嘅陳爸爸四年前去日本玩，第一次見識到靚到不得了嘅日本錦鯉，自此埋頭鑽研。佢索性響番禺、即係珠江鋼管總部附近，開咗一個面積成200畝地嘅養魚場，而家已經有30幾、40條冠軍魚，每年生成800萬條魚仔！咁世界冠軍點解叫西施呢？原來陳昌覺得，四大美人中西施最靚，有人想用300萬元收購佢條愛魚，佢都唔制。話時話陳昌嘅興趣真係多到不得了，最近參加埋番禺市嘅乒乓球大賽，全市成300萬人中排70位，威過好多後生仔。