咪以為撈金融業嘅單身男士，一定唔怕搵唔到女朋友！《蘋果日報》前財經記者，現職財經專欄作家嘅陳景揚，就係活生生一個例子，話你聽金融才俊都可以冇女吼！
有「財經界許志安」之稱嘅景揚，最近參加內地相睇節目《非誠勿擾》，希望搵到屬於佢嘅緣份。
先講造型啦，景揚冇刻意打造金融才俊形象，反以典型「港仔」、帶幾分MK打扮示人，已經令華華頗為意外。不過，更令人驚訝嘅係景揚嘅坦白。話說景揚黯然提及昔日愛情故事，話以前有個「港女」女友成日要佢𠱁，最終佢唔肯再𠱁，結果就不歡而散。講到港女咁差，但偏偏節目一開始，就表明對現職空姐既港女吳子恩有興趣，真係矛盾。
坦言𠱁女仔有容量
本來被飛就好閒嘅，不過當有女嘉賓講到，女人鍾意人𠱁，要佢體諒時，佢竟然話「覺得人就像有一個容量」，意思係話容忍有限度。呢番言論的確令人好震撼！佢上得節目，都係想吸引女仔啫，何解咁坦白，講出呢番女仔唔啱聽嘅偉論呢？
礙於造型以至言論均「遜於市場預期」，結果24位女嘉賓迅即給予沽售評級，冇一位對佢有興趣。節目一出街，旋即成為財經記者界熱話，甚至PR亦熱議。對於突然成為風雲人物，景揚接受華華訪問時表示：「冇感覺、冇回應」。隨後在微博上坦言：「對於前一段感情，我心裏感激，沒有怨恨，更沒有唱衰。」
李華華
mailto:[email protected]