金手指:繼續一注買珠管 - 孫柏文

金手指:繼續一注買珠管 - 孫柏文

上個禮拜五收市後,孫柏文舊年3月叫大家一注獨贏買嘅珠江鋼管(1938),出咗業績。我叫大家買嘅原因,係因為全球頁岩氣革命,佢哋生產出嘅天然氣用管道運輸有成本效益而受惠。
上個禮拜二,我預期珠江鋼管盈利及營業額喺2012年按年各升兩成五。亦因有咁嘅預期,我重申短期目標價5元,12個月目標價7元。
業績出咗後,珠江鋼管喺2012年,營業額較我預期遜色,升一成六,盈利就超出我預期,升三成三。

毛利率有上升空間

噚日,即業績出咗之後嘅第一個交易日,珠江鋼管就chok咗落來,跌6.62%,收3.67元。咁點解跌?我諗係因為上半年盈利及營業額,分別升五成同兩成,所以有啲人就沽出。
我只可以話呢啲人係傻嘅。因為你睇佢08年金融海嘯減嘅單,要2010年先顯現,所以2011年上半年都仲係非常弱,相比之下,2012年上半年變相好強,而因佢2011年下半年開爆turbo,所以2012下半年好似差咗。
細心留意係2012年下半年,相比2011年同期營業額及盈利都有升幅,盈利升兩成,仲因佢哋下半年有唔少廠房投產,有唔少開廠使費,如果減咗額外使費,盈利升幅將會似頭半年。未來啲全球頁岩氣及其他例如頁岩油同炭漿嘅管道需求帶動,盈利同更緊要嘅毛利率將會同呢兩年一樣咁升。
大家睇佢派息,升三成三,同盈利升幅一樣,代表管理層覺得呢種盈利升幅係理所當然,今年都會有嘅現象。佢仲有塊地話可入賬,值10億元人民幣。噚日跌咗落嚟,令呢間市值37億元、盈利連續兩年升幅有三成三嘅公司,得9.6倍市盈率。如果佢市盈率是20倍的話,應該抵俾人質,但以𠵱家嘅市盈率,所以,繼續重申一注獨贏珠江鋼管!

孫柏文
獨立股評人
http://facebook.com/shuen
本欄逢周二刊出