熱火真係贏到唔識輸，周日主場對魚腩山貓；雖然有主力獲迪因膝傷而要缺陣，不過「大帝」勒邦占士轟入32分，以109:77大炒客隊連贏26場，離1971/72年湖人嘅33場紀錄越嚟越近。連勝紀錄唔止引咗一班名人入場睇波，仲帶挈當地電視台收視上升㖭！
熱火由2月3號起一直贏波，對山貓之前已經連贏25場；咁啱邁阿密近日有網賽舉行，引到網球1哥迪祖高域到現場睇波，另外高球1哥麥艾萊亦有入場。熱火開賽有啲慢熱，第一節試過落後客隊11分；不過，就算冇獲迪，對住現時喺東岸包艇嘅山貓，大帝自己一個都已經夠打啦。第2節主隊已經反超前，之後越拋越遠，最後以32分狂炒對手，贏多8場就可以超越由湖人保持嘅最長連勝紀錄。
逾800萬人次收看
大帝除咗轟入32分之外，仲有10次助攻，而佢另一拍檔保殊都有15分進賬。獲迪雖然冇份比賽，賽後身穿白色西裝走去客串訪問大帝。大帝話迪祖同麥艾萊入場睇波，令到自己打得仲更加落力：「有其他運動項目嘅名人入場睇己隊打波，感覺同平時真係好唔一樣，我想令佢哋留下深刻印象。」連勝紀錄除咗令到一班體壇巨星入場之外，仲令到電視台收視上升；ABC電視台播熱火比賽，平均有成3.7點收視，即係有大約610萬人次睇波；而ESPN都有220萬人次（即1.8點收視，比起其他球隊比賽收視率高多達29%），就咁加起嚟都過800萬人次。
至於香港直播NBA嘅現在台就表示，會集中播西岸嘅比賽，所以暫時唔會加多幾場熱火比賽，香港觀眾就只好同熱火作客馬刺，同埋主對紐約人兩場大波，緣慳一面。熱火未來8場（見附表）最大阻力，係嚟緊周日作客對西岸龍頭馬刺，之後主場對紐約人亦都唔可以鬆懈，話晒藍橙軍團今季同熱火嘅4場系列賽，都仲以2勝1負領先緊。