港交所（388）行政總裁李小加噚日約咗立法會議員王國興、證券及期貨專業總會會長王國安、證券及期貨從業員工會會長林德明，再加埋一班業界代表見面。而港交所方面亦擺出強陣應戰，除咗小加總裁外，仲包括股本證券與定息產品及貨幣業務部聯席主管陳秉強及戴志堅，同埋集團傳訊總監羅文慧等六名高層。
聽講今次會議目的到底係乜，好多人喺會前都搞唔清楚。好似班小經紀就以為港交所係為咗佢哋強推夜期而擺返圍「和頭酒」，而港交所嘅職員就以為小加總裁要講吓集團未來發展，仲有職員叻唔切咁幫小加總裁準備咗一共10頁、題目係《2013-2015年集團戰略願景與使命》嘅powerpoint。不過小加總裁睇到後似乎唔多like，仲訓示話今次唔係港交所做presentation做乜預備埋啲咁嘅嘢。
咁到底個會議係搞乜東東？原來小加總裁既唔係想𠱁返班小經紀，亦都唔係要講港交所有乜鴻圖大計，只係純粹想同業界傾吓計，大家溝通吓。聽講最後雙方都幾好傾，一傾就成個半鐘頭，由期指夜市、延長交易時間到IPO質素等無所不談，相信都算係業界同港交所一次幾好嘅破冰開始。