百貨股幾年前曾是基金最愛，增長高不特止，二房東的角色亦令佢地唔使承擔一般零售商的存貨風險，但銷售所得現金卻是佢哋自己先袋，着數非常。他們成功與否關鍵在於做唔做得起個場，只要建立到人群聚集同購物的習慣，咁收入就可以相當穩定，銅鑼灣Sogo便是好例子。
又好似最早進入中國百貨市場的百盛（3368），市盈率在高峯時曾高達60倍，但今時今日大家等它復蘇已等到心死，公司老店太多，早年又錯過可以翻新同rebranding時機，導致現時就算想搞，在分店逾40間規模、市況又疲弱情況下，早已是力不從心。
以前投資者最常問的問題，是內地百貨公司呢種channel可以紅幾耐。由於早年內地消費者未成熟，「唔知自己想要乜」，因此百貨的優勢就是把覺得啱你用嘅產品集合在一起，教埋你買乜先啱。
但到了現時，很多一、二線消費者對國際品牌的了解程度，隨時高過你同我，他們會直接選擇去自己喜歡的品牌分店，百貨的優勢削弱了，它的黃金年代恐怕已過。
海迪