平時贒實警察有冇濫權嘅監警會委員，上星期齊齊轉行做海盜同水手。點解要轉行？只因佢哋咁啱有周年聚餐，監警會公關想大家熟落啲，決定搞搞新意思，叫各委員以Nautica Look示人。有咗dress code，於是咪個個變身囉。主席翟紹唐戴咗頂海盜帽，唔通想唔做大狀轉行去老笠？民主黨黃碧雲都着番件水手衫，相當入戲。山西省政協馬恩國都整番頂船長帽，睇落佢個look似水手多啲。據聞佢喺聚餐中開心唱K，好明顯冇受早前喺立法會爆粗事件影響啦。當日仲有好多監警會職員出現㗎，佢哋一直默默耕耘，幫班委員睇file審議個案，部份職員同委員都係當日先首次相認咋。