尤德夫人噚日專誠由英國飛香港，頒發第26屆嘅尤德爵士紀念基金，尤德係見證《中英聯合聲明》簽署嘅港督，近日咁多份中英談判密件公開咗，八方同行家見到尤德夫人，梗係把握機會問下佢有冇內幕啦，不過訪問好快就變咗訪問佢身旁嘅陳祖澤。
陳祖澤係基金理事會主席，傍住尤德夫人做訪問都好應該，不過訪問就好似搶答比賽咁，當尤德夫人仲諗緊個問題，陳祖澤已經㩒咗燈同答埋。好似記者問密件內容，陳生率先回應呢個係歷史一部份。再問佔領中環睇法，陳亦好快話普選始終有，係要討論細節啫。咁講吓預選機制喇，答案係尤德夫人已經唔喺香港政治圈喇。八方宣佈比賽結果係：陳生全取三分！