美國NCAA大學籃球錦標賽一向都係爆冷嘅溫床，就算係頭號種籽都唔係贏波保證。上周六今年戰績最好、有NBA名宿史托頓之子押陣嘅岡薩加大學，喺第3圈對威奇托州大，竟然爆大冷以70:76輸波出局！
岡薩加今季以31勝2負嘅超班馬成績，喺美聯社同《USA TODAY》兩個排名榜都排榜首，被各界視為奪標最大熱門。日前佢哋喺第3圈對住被睇低一線嘅威奇托州大，以為食硬對手，點知被對手守到一戙都冇，投射命中率只得36%；而且威奇托外投超強，全場有14次3分波得手，最後以6分之差爆出今年NCAA最大冷門！
爵士名宿史托頓喺岡薩加成名，今場亦有到場睇波；撐母校係入場原因之一，不過最主要都係睇囝囝D史托頓嘅表現。可惜，以第6人上陣嘅小史托頓，上陣17分鐘只得4分，全場冇乜表現，救唔到岡薩加。另外，大熱之一、有添夏達威兒子坐鎮嘅密歇根州大同日以78:53輕取維吉尼亞聯邦大學，殺入「Sweet 16」（16強）。