（樂）塞浦路斯目前正受到金融危機影響，前景唔明朗。不過，國家足球隊就畀咗國民一個小驚喜，球隊喺世盃外E組竟然可以主場同榜首嘅瑞士打成0:0。基本上，塞浦路斯呢場波唔使輸已當贏，仲要冇失波，結果塞浦路斯攞1分後，壓過斯洛文尼亞，脫離榜尾。對於瑞士嚟講，和波仲可以保住小組榜首位，領先阿爾巴尼亞同冰島2分，但就冇面囉！