政府頻頻出招打壓樓市，呢個時勢竟然仲有人敢用成億掃樓！講緊嘅係籌備緊上市嘅景鴻移民創辦人關景鴻，市場傳聞話佢啱啱用約1.2億元，同信置（083）買起大埔天賦海灣1期3座頂樓全層，亦有人話佢只係轉介個移民客幫襯發展商買樓，究竟邊樣先真？
用成億買起嘅天賦海灣1期3座頂層一共有三個單位，夾埋建築面積有6,008方呎，連4,973方呎天台，望晒全海景。
其中最大嘅單位有成3,021呎，有四個房之餘兼有一個192呎泳池仔。如果以1.2億元計，平均呎價都要近2萬元，由於一個買家成層要晒，所以私隱度極高。
消息就話，有代理睇到關景鴻公司代表日前去發展商售樓處搞買樓手續，但亦有人話佢只係去幫公司個移民客揀樓！華華出於好奇於是去問關景鴻，但就搵咗幾個鐘都搵佢唔到，唔知係咪真係有入市呢？