唔經唔覺，今日已經係「行騙長官」梁振英勝出特首「小圈子選舉」一周年，雖然CY民望越跌越低，但一眾「梁粉」依然撐到盡，好似耀才（1428）主席葉茂林噚日就話，「無論點都好，我都支持特首。」堅真心！。
葉茂林話喺呢個環境，「行左又俾人鬧，行右又俾人鬧！」邊個施政都有困難啦，所以佢會繼續支持CY嘅，仲暗讚政府喺樓市政策方面有先見之明，「政府行快人一步，因為如果將來加息加得勁個樓市一定跌好快，但𠵱家BSD嗰啲招數，已經令個市有心理準備在先，就算跌都唔會太多，政府到時又可以取消辣招，托番個市。」
教路兩年後先好買樓
佢仲話隱隱覺得𠵱家個樓市好唔健康，樓價肯定貴過97年高峯，建議華華兩年後先至好買樓，「我覺得九個月後應該會加息，咁就會跌啦，所以𠵱家儲定錢就差唔多啦！」佢又話樓市同舖位已經見晒頂，就好似佢喺幾個月前用1.8億元買嘅佐敦金勳大廈舖位連1樓，𠵱家個價已升到4億元以上，但就冇諗住賣。又話舖價到頂，但又唔賣住，到底邊句真㗎？