兩會過後，新領導班子登場，香港呢一邊正熱烈討論佔領中環，大家都在觀望中央政策會否改變。胡溫執政年代放棄改革，改走倒退維穩方式，用外判政治工作方式，監控異見及維權人士，造成國保橫行、流氓執法，國家形象大受損害。
香港近期湧現一堆愛字頭政治團體，主事人背景不清，以激進行動為主，攻擊泛民，文鬥武鬥兼而有之，建制派主流一直唔承認屬於佢哋嘅系統。上次挺梁遊行在廁所派250蚊招募職業撐梁群眾，記者追查到同新界商會有關，呢類傳統上不活躍之團體，近年開始同好多古靈精怪活動有關，相信係民建聯、工聯以外的政治系統。我估計應屬內地廣東省維穩機器在港伸延，唔似係本地勢力。
激進建制勢力開始主動出擊，好似砌港台工會乃英國走狗，大班街頭廣播就去搗亂，當佔領中環討論越升溫，愛字頭團體就會四出滋事，製造混亂，嚇窒中產市民，因怕亂而唔敢支持戴耀廷。
中央收編商業媒體
至於中央維穩戰略，比地方級數高，唔會靠愛字頭人馬。首先當然針對傳媒，所以先有港台工會人士提前火併鄧忍光事件，早將矛盾公開化，港台內反赤化勢力正係知道今年雙方火併難免。另一大工作是收編商業媒體，電視方面CCTVB已變喉舌，電台方面商台只剩下潘小濤、李慧玲兩人，網台只有大班D100。報章方面《信報》在梁振英律師信事件已顯示歸位，數來數去剩低《蘋果》。共產黨有眾多代理人，旺旺集團買到台灣《蘋果》，自然有人可以買起香港《蘋果》，最後只睇肥佬黎取向。
另一個新媒體戰場，電訊4G牌中，中移動（941）高價投牌，如果有中央維穩政策撐腰，用低價搶佔市場份額的話，有好大戰略意義。將來流動媒體會成為主流，控制電訊市場，比控制電視可能更重要，尤其在監控維穩工作方面。2013年在政治上是關鍵一年，內地認為要寸土必爭，集結號已吹起，好戲陸續上演。
添馬男