本周是決定塞浦路斯命運的一周，歐盟企硬要徵存款稅，俄羅斯又唔科水，塞國可謂孤立無援，等死機會甚高。歐元區信心危機一觸即發，但市場反應出奇地克制，歐美股市僅略為回吐，港股雖弱，上周五亦僅跌110點，似乎市場認為即使塞國出事，都唔會影響大局。
不過，當年雷曼兄弟爆煲時，如美國當局知道會引發金融海嘯，又會否見死不救？一個決定，足以致命！魏力可能太悲觀，但市場或許真的低估了一旦塞國失救，對歐元區以至全球的打擊。
指數雖跌，唔少板塊繼續喪炒，興業太陽能（750）勁彈一成、威勝（3393）績佳狂升15%；水務及環保股陸續破頂，本欄上日推介的國電科環（1296）相對落後，可繼續留意。另外，北京建設（154）有母公司北控（392）力撐，轉搞垃圾發電，市值不過18億銀，可塑性甚高。公司本周三將公佈去年業績，雖料見紅，但今年才是轉型後首年，隨時大翻身！放榜後睇定買入作中線投資，值博率不俗。
魏力
http://www.facebook.com/2012jason
本欄逢周一、二、四、五刊出