相信唔少《爽報》讀者都曾經代入，當自己係其中一位〈爽組合〉參賽者，然後想像自己點樣英明神武咁勝出比賽，兼從黎老闆手上贏大筆獎金，然後出現喺〈中環在線〉，講吓自己炒股血淚史。晉佳都有諗過，參賽者應該用乜策略去同咁多高手鬥呢？
玩遊戲唔一定話要贏先開心，作為投資者，maximize profit最重要，晉佳會選擇用〈爽組合〉嘅資金全部買「次貨」，各位冇睇錯，真係買「次貨」。
港股市場有千幾二千隻股，每日升嘅股票正常係幾百隻，閣下手上最有信心嘅股票，有幾可能打入廿大升幅榜？即使幾有信心都唔會知道你隻股最終賺幾多，與其係咁，〈爽組合〉持倉又何須係自己真實持有嘅股票？晉佳會用70%至100%資金買自己冇揸嘅股，最多留番30%買所謂極具信心、喺真倉同時持有嘅股。
用70%資金買「次貨」
點解要買「次貨」？最大好處就係當做對沖。〈爽組合〉本金300萬元，勝出者獎金係所贏嘅一半，相等於泥碼金額150萬元。就算面對升市，一樣有對沖嘅條件，假設真倉同〈爽組合〉嘅股票組合幾乎完全唔同，如果真倉表現較好自然飲得杯落，如果〈爽組合〉批「次貨」反而跑贏真倉，其實都冇壞，有機會跑第一贏獎金，咁就可以善用到泥碼嘅好處，當然閣下有錢到認為150萬元泥碼太少，就另當別論。
真倉雖然係真金白銀，但唔使見人，贏輸只需向自己問責，但〈爽組合〉起碼要向幾十萬讀者交代，面皮薄啲嘅話，輸面子壓力分分鐘緊要過輸真錢。如果真倉還真倉，〈爽組合〉還〈爽組合〉，壓力嘅問題自然可以減低，個組合輸起上嚟都冇咁容易影響心情啦。
至於應唔應該一注獨贏？晉佳就寧願分三、四注好過，冇乜原因，純粹個人喜好。除非有能力操控單一股份價格，否則晉佳唔覺得分三注，回報會輸蝕過一注獨贏幾多。至於近期要買貨，睇圖隻創科（669）都可以坐吓啩。
晉佳
本欄逢周一、三及五刊出