做埋今個月尾就停播嘅香港人網，噚日直播可能係最後一次嘅街頭論壇，由民主倒梁力量主辦，討論最近hit爆嘅佔領中環，吸引逾百名市民圍觀，唔少人網忠實聽眾撐場，一人舉起一個「支持人網」牌；有市民有感而發，藉呢次最後直播，勸人網創辦人蕭若元咪意氣用事做落去，贏得唔少掌聲。
人網今次突然摺埋，有傳蕭若元同人民力量主席黃毓民就佔領中環一事上唔咬弦，毓民噚日喺論壇開始前就再次否認，「佢有鬧過我咩？冇吖嘛，點會不和」。不過人網係人力嘅「長期戰友」，甚至有傳係金主之一，閂咗條水喉又冇咗條發聲渠道，毓民就話冇有怕，好有自信咁話：「人網執笠人力就玩完，乜嘢理論？咁容易冧咩，我都未死！」