費蘭度托利斯（費托）加盟咗車路士已經兩年有多，踢到今時今日都仲係唔多識入波。日子咁難捱，可能真係就嚟要講拜拜。不過要搵球會接手呢位大貶值嘅高薪低能射手真係唔易，就喺呢個時候，曾經喺球員時代同費托做過隊友，而家喺馬德里體育會執教嘅施蒙尼伸出友誼之手，放風話唔介意斟費托返嚟母會，認真夠義氣。
費托喺佢11歲嘅時候就加入馬體會青年軍，喺呢度上位成為國際一線球星；佢亦喺03至05年同施蒙尼做過隊友，相信佢兩位亦有一定交情。費托喺車路士一直都搵唔番射門觸覺；另一方面傳咗好耐車路士球會對馬體會當紅射手法卡奧好有興趣，順理成章就有車路士以費托作為籌碼去斟介法卡奧嘅傳聞。當日車路士花成5,000萬鎊買費托返嚟，但據講經過兩年貶值之後，𠵱家身價只值1,000萬鎊。
傳車仔想換法卡奧
費托換法卡奧呢單嘢係咪成事仲係言之尚早，不過馬體會教練施蒙尼就已經話會歡迎費托回歸馬體會：「費托𠵱家仲係第2支球隊嘅球員，我哋要等到今季完咗之後，先可以正式物色啱用嘅新兵。費托對於馬體會嘅歷史有深入了解，如果佢返嚟嘅話，以佢嘅能力絕對足以勝任。我哋亦曾經喺馬體會並肩作戰，我好清楚佢可以成為重要嘅球員。」
不過施蒙尼亦強調講咁多費托，並唔代表法卡奧一定會喺今季之後過檔車路士：「我唔係法卡奧本人，亦唔係佢經理人。作為球隊嘅教練我係非常尊重佢，由當年喺河床到𠵱家喺馬體會，佢都係一樣咁專業，為效力球隊竭盡所能。至於講到前途同去留問題，每人都會有唔同諗法，只要大家互相尊重就已經冇問題。」
馬體會今季由施蒙尼領軍下成績相當出色，大部份時間都一直位列西甲次席。以呢間球會嘅財力，要負擔費托𠵱家喺車路士據講成16萬鎊嘅周薪自然有難度；既然施蒙尼𠵱家開咗回家之門，費托如果肯賺少啲回巢，返到屬於自己嘅地方，壓力少啲人都開心啲，隨時入球觸覺都返晒嚟。