香港人等了又等，忍了又忍，以為2017年可以普選特首，𠵱家因為喬曉陽一句「不能接受與中央政府對抗的人擔任行政長官」而幻滅！噚日喬老爺美其名同建制派議員舉行座談，實則係放話講北京對假普選嘅睇法，不過佢嗰班「傳話人」一時擦錯鞋搞錯佢職銜，一時又傳錯話，最後要喬老爺罕有地將講話內容撮要出稿，即場派畀傳媒，以免有人「假傳聖旨」。
噚日喬曉陽現身深圳麒麟山莊，主動向傳媒講，多謝港人咁關心佢工作上嘅變動，即係冇做基本法委員會主任後，轉去做全國人大法律委員會主任委員。但民建聯譚耀宗主持座談會時，一嚟就恭喜佢再做「基本法委員會法工委」主任，口快快落錯鞋油擦錯鞋，講錯人哋個職務，要喬老爺開口糾正，叫佢搞番清楚，仲話其實香港傳媒報道佢職銜時，一般都交代得好清楚，唔通暗示譚Sir冇理由搞錯？
林健鋒「假傳聖旨」
不過，講錯職銜相比傳錯話，都算係閒事，喬老爺一心南下放話，畫公仔畫出腸唔畀港人真普選。經民盟林健鋒座談未完就率先同傳媒簡述喬老爺講話，咁開誠布公八方當然歡迎。佢引述：「特首應該愛國愛港，如果一個同中央政府對抗嘅人，係對香港不利，亦都不能接受。」點知話口未完，喬老爺就親自澄清冇講過「對香港不利」呢類說話，仲責怪傳媒報道出錯，真係冤枉好人。
李八方
mailto:[email protected]