今時今日，結婚擺酒過百圍可能唔算得乜嘢特別事，有錢就得，但響圍村鄉公所擺過百圍盆菜宴就唔係人人都擺到，講緊嘅係前百富勤i-banker陳崇輝（Frank）。Frank下個月就會結束王老五生涯，𠵱家已轉行投資博彩公司嘅Frank，當然會響酒店擺酒宴請佢班金融界同生意上嘅朋友，但由於佢係打鼓嶺圍村人，仲會搞場百圍盆菜宴㖭。
重鋪爛地 誠意爆燈
咪睇Frank係番書仔一名，由於佢係圍村人，又係圍村男丁，娶老婆咁大件事，大把鄉親父老要請。為咗唔想鄉親老遠由打鼓嶺去市區飲咁長途跋涉，Frank專登將圍村鄉公所對開一塊爛地鋪為石屎地，等佢可以響塊「靚」地豪擺過百圍盆菜宴。
講開圍村盆菜宴，華華第一時間諗起潮流達人鄧達智（William），William之前都試過響圍村豪擺盆菜宴。
據Frank講，鄧氏係新界西嘅圍村人，佢就係新界東，雖然東西各據一方，不過佢同William私底下老友鬼鬼，不時約埋食好嘢，今次亦當然會請埋William飲。為免失禮成村人，Frank今次嘅盆菜宴用料都係自己負責，再請師傅主理，認真夠誠意！