南看台向來係七欖迷兵家必爭地方，皆因出名好氣氛，就算大排長龍都心甘情願。27歲嘅無綫藝人李思雅（Cindy），咁大個女首次踩入「聖地」，仲膽粗粗搵啲出位球迷合照，佢話：「好刺激、好crazy。」以下係佢嘅「處女精選」，仲親自畀分㖭！（5分滿分）
荷蘭銀女
「佢哋係我嘅朋友（上圖），兩個都原籍荷蘭，最欣賞佢哋用成兩個鐘由頭到腳都塗上銀色，仲用800蚊買黃牛飛入場，好有誠意。」（5分）
單車達人
「除咗身上件環法單車衫，佢仲設計咗架單車擺喺褲襠，仲可以響鈴鈴，好有心思，最正係食到近排紅爆嘅李慧詩熱潮。」（4 分）
藍精靈
「呢隻藍精靈扮得好似，仲將塊面塗勻藍色，唔怕傷皮膚；如果要我扮，我會揀卡通人物，最鍾意史迪仔同多啦A夢。」
（4 分）
