求婚男打動芳心
恭喜恭喜，噚日有位叫阿John（左）嘅球迷，買咗99支玫瑰兼鑽戒向女友Carmen求婚，原來兩人喺大專欖球賽相識，所以John決定趁七欖喺大球場眾目睽睽下求婚，女友當然冧爆應承啦！
環保三點式搶鏡
呢兩位日本球迷Aya（右）同Kim（左），佢哋身上套比堅尼泳衣其實係用環保袋裁剪出嚟，再用黑色膠布貼緊，Aya話想以身作則，希望啲着住鬼馬服裝嘅球迷，唔好再咁唔環保喇！
余翠怡慘被「空姐」圍
倫敦殘奧兩金得主余翠怡（右二），已經連續4年應邀到七欖，噚日佢同打過欖球嘅表妹（左）齊齊闖入南看台，遇到班男扮女生嘅「空姐」圍住合照，翠怡5月就去意大利比賽，係自去年9月殘奧後首項比賽。
