（喜）費托難留喺車路士，或者會返去馬德里體育會；這邊廂一位故人隨時會喺下季同車路士重逢。車路士球迷到𠵱家都仲好掛住摩連奴，而佢亦喺日前公開話有機會重返昔日執教過嘅球隊，照佢咁講最有可能食回頭草嘅地方會係車路士噃。
「下一站係執教過嘅地方」
趁呢個幾星期進行國際賽，得閒啲嘅摩連奴返咗去佢出生地葡萄牙嘅塞圖巴爾，出席當地為佢50歲生日搞嘅展覽會。摩連奴喺會場上亦有就自己下季去向講幾句：「所有人都知道我充滿冒險精神，成日會周圍去接受挑戰；亦因為咁，咁多年嚟實在難為咗我嘅家人。經過喺葡萄牙、英格蘭、意大利到西班牙嘅旅程，要搵新嘅目的地實在唔容易。所以下一站會係我曾經執教過嘅地方，但可能偏偏出乎所有人嘅意料之外。」
除咗車路士之外，摩連奴昔日曾經做過波圖同埋國際米蘭等球會嘅主帥，到底確實會去邊隊，真係要佢自己先知。不過講到仲想做幾耐教練，摩連奴就希望永不言退：「如果上帝可以賜我一直身體健康，𠵱家我只係到咗執教生涯嘅一半咋。」