獅子行孖住國泰一齊贊助嘅（香港國際七人欖球賽Hong Kong Sevens，簡稱七欖），乃城中盛事，噚日（周日）啱啱舉行完決賽，華華仲記得，嚿年決賽日適逢「豬狼對決」──特首「3.25」小圈子選舉，結果狼英上台。
嚿年七欖由滙控舵手歐智華壓陣，去完北京拜會王岐山（時任國務院副總理）後，風塵僕僕即刻飛嚟香港觀戰兼頒獎。不過，今年佢老哥就無現身，未知是否閉關，要砌掂5月中策略日目標，準備公佈第二個三年大計。始終都係工作要緊，呢啲粗重嘢交畀其他人做都無問題。
歐總唔嚟，今年就改由英國滙豐行政總裁羅伯恩（Brian Robertson）主持頒獎。呢個大型盛事，財務董事麥榮恩都有出席，剛上任冇耐嘅零售銀行大佬John Flint同埋炒房一哥Samir Assaf亦有嚟撐場。
前朝獅子人出山聚舊
Rugby係洋人杯茶，好多前朝獅子人，都鍾意趁七欖觀戰兼聚舊，好似深居簡出嘅滙豐「神級」巨擘浦偉士，嚿年就亮相頒獎台頒發七欖銀盃獎。
華華聽講，今年可能應邀出席嘅前高層，包括前滙豐銀行執行董事施偉富（Selway Swift），同「阿靚」林紀利（Chris Langley）。其實Langley心繫香港，久唔久都會喺中環現身，呢位英國紳士，見親華華，永遠都保持一貫溫文爾雅，彬彬有禮。
李華華
mailto:[email protected]