前文提及住屋問題乃是市民揮之不去的煩惱源，不過真正值得體恤、關懷及伸出援手的始終是身在貧窮線下，且沒法受惠於政府各種福利的一群，點都唔會係嗰啲只在乎滿足置業或創富需求的人士。其中尤以上唔到樓（公屋），要以豪宅呎價租住劏房「毫宅」的困居戶，境況更是堪憐。
據早前統計，香港起碼有15萬人以劏房為居所，而政府要不只是表示認真關注（卻苦無對策），再不然就係殺氣騰騰話要嚴厲取締，但請問數以萬計嘅劏房戶如何容身？
最近屋宇署就此亦做咗啲廣告，內容好簡單，就係「以工廈劏房為家危險多。」每次我見到呢啲宣傳語句，即時都有簡單回應一個「X」字！鬼唔知呢啲違規劏房嘅環境、衞生以至安全條件，根本就唔適合居住、好危險及好惡劣咩！但這已是露宿街頭的唯一奢侈選擇。正如，每人皆知唔好食啲過期或被商店棄毀的食物，亦知唔應該由朝做到晚、操勞過度，但真係有好多人要如此卑微，方可果腹和維生。可惜的是，公帑總是白花花的用在好做唔做的決策和於事無補的舉措上。
也是因為望官不能打卦，所以我們只有自求出路。但劏房咁大個社會難題，政府除咗會諗吓租金津貼（卻會變相益咗業主叫價），始終一籌莫展，咁民間又可以做到啲乜呢？容我介紹一間在兩年多前成立的企業。創辦人本是知名美資消費品公司的香港總經理，一日毅然拋下多年建立的事業，而去追求一份更有意義的工作。為此，還特地去考取地產代理牌照……只因他想經營一間與眾不同的地產代理公司。
平租單位予貧窮戶
首先，公司沒有直接客源，因為全要由其他合作（社福）夥伴機構轉介。再者，只做租務生意，而租客全都是有住屋需要的貧窮家庭，過往他們只能愁困劏房，今日卻可享有更具尊嚴的住屋機會，就算係一間梗房都會有窗、空氣流通，有基本裝修和配套，而人均可用面積起碼達到70平方呎的最低標準，最重要的是絕非僭建。至於放租單位全是良心業主持有的私人物業，不少都是長期空置且沒好好運用的資源，而只要他們有為善扶貧之意，願收取較低的市值租金（租金以受惠人的負擔能力釐定），就可以透過這間中介公司配對合適租客，教貧者有其所。
「要有光」是這間企業的名稱，而其出租的單位就是「光房」，目的也在於為貧窮家庭帶來安居之「光」，並借助這居所平台連結其他跨界支援，又似「光合作用」，好讓受助者最終可以自助；同樣也讓人明白，只要有心，創富之餘，也能造福社會。不過呢啲嘢，嗰位一心劏房求利的局長，睇怕諗都未諗過。
盧先亞