隔牆有耳:<br>網民發起 買飯飛 贈長者 - 李八方

隔牆有耳:
網民發起 買飯飛 贈長者 - 李八方

香港好多老人家生活困苦,三餐不繼。一班有心人搞咗個「區區有飯開」行動,搵小店幫手寫飯飛,善長可以買一叠再免費派畀老人家。有心人話政府政策幫唔到老人家,惟有民間自發,希望全港18區都有市民響應,孝敬基層長者之餘,又幫小店繼續生存,一舉兩得。
呢個行動概念源自深水埗北河燒臘飯店(上圖),有心人之後陸續搵到其他細餐廳手寫飯飛,善長一般會買十幾廿張,派畀區內拾荒者、露宿者或者擺地攤嘅老人家。飯飛係劃一價錢,例如每張賣25蚊。老人家拎住張飛入去當現金券用,再補番飯錢差價。
目前除咗深水埗北河燒臘外,新蒲崗合利餐廳、觀塘嘉樂美食、長沙灣美園粉麵都有飯飛賣。有心人幫餐廳影相擺上網,希望帶頭示範,鼓勵全民參與,遍地開花。各區市民不妨都發掘下區內平靚正良心小店,敲門向老闆介紹呢個飯飛計劃,再自掏腰包買一叠,派畀區內有需要嘅老人家。