【第32屆香港電影金像獎頒獎禮之男配角篇】跟林家棟在佐敦道的彌敦酒店頂樓做訪問，曾幾何時電影蓬勃，差不多每日都有記招在這處舉行，「彌頂」成了興旺的代名詞，慨嘆是家棟未見證過盛況。拍電視出身，掹車邊趕上合拍電影的第二春，下月13日舉行的香港電影金像獎，是家棟第三次提名最佳男配角，論成就只是比上不足。監製的電影反而毫不失禮，頭一趟就獲金像獎的最佳電影獎，自言機會來自上一代，回饋演藝圈造就下一代接班人，傳承成為這位金像獎候選人的大題目。
撰文：何永寧
電影《一代宗師》帶出傳承的討論，林家棟出身電視台，啟蒙良師萬梓良（萬子）是當中之一，家棟自言跟萬子的關係亦師亦友：「當時喺電視台自己仲係𡃁仔，唔好以為電視台淨係勾心鬥角，萬子就係好肯畀機會後輩演員，佢成日同導演講『做乜成日大頭見我呀，影吓啲後生仔，影吓家棟啦，唔使每一個鏡頭都見我』多得佢我多咗唔少機會，出鏡同對白都多咗。平時佢同我特別好傾，教我點演戲，仲教我好多做人處世道理。」
人稱蝦叔的關海山亦是家棟在電視台的益友，家棟憶述拍《萬里長情》時一班台前幕後在開大會，監製及導演等高層都在場，會上各自發功針鋒相對，但表面卻如閒話家常。當時家棟還未理解是甚麼一回事，抽着煙瞇起眼坐在旁邊的蝦叔已非常心水清說：「細路，呢啲咪戲囉，真係做戲都做唔番呀！學嘢啦！」自此教曉家棟在現實中觀察人生百態，融入演技當中，家棟說：「蝦叔講咗好多道理，真係上乜嘢訓練班都學唔到，電視台日子真係木人巷，呢幾位前輩教曉我好多事。」
兩大高手夾擊
家棟跳入大銀幕更遇上人生中最大的老師劉德華，他說：「華仔對我影響當然最大，啖火好似turbo咁，我喺電視台已經出名俾人叫『林監製』，即係乜都畀意見，估唔到我拍埋華仔度仲差好遠，佢除咗講，仲落手落腳做，呢樣唔到你唔服，巨星都咁認真，同佢合作嘅仲點敢懶，佢又畀我睇到世界原來咁遼闊。」
家棟踏足電影世界，參與過不少電影，《愛君如夢》、《無間道》及《神探》，到近日第三次獲提名角逐最佳男配角的電影《寒戰》，對於上兩次落敗，家棟記憶猶新：「做演員當然想攞獎，話唔想都係呃你，第一次《愛君》輸就唔好講，係好應該，嗰時都唔知演戲為何物，自己睇番都覺得好稚嫩，第二次《葉問》本來覺得有機會，因為個角色自己花好多心機去豐富，不過最後都係輸畀《証人》嘅廖啟智。」家棟自言得獎要靠天時地利外，同場對手亦很重要，今年就遇上兩大高手，他說：「其實今次都冇諗過《寒戰》可以入圍，全套戲我講嘅對白唔夠20句，當然好開心，我會睇好《低俗喜劇》嘅鄭中基，不過私下梗係想萬子大哥贏，會開心過自己攞到。」
提攜後起之秀
相對演員生涯，林家棟目前兼任的幕後工作似乎更加突出，大前年監製的電影《打擂台》就非常成功，他說：「有時覺得香港影壇後面一班人冇機會上位，來來去去都係嗰班人，好多時係投資老闆唔肯博，用新人喎，有乜保證？梗係用有把握嘅舊人，做成影圈青黃不接。我同華仔理念好近似，喺容許情況下盡量畀機會新人，所以我除咗演戲，近年好多時間都搵新編劇傾劇本同搵投資。」他鼓勵新晉的編劇開會時不妨儘管講、儘管想，千萬不要有包袱，這是家棟當監製的理念：「你唔講點知唔得，唔試就唔得，試過一日睇同聽幾個劇本，好多都係後生仔，技巧可能係好嫩，但係好有火，影圈就係要呢啲，當年我嘅機會都係靠前輩畀我，我只不過將呢個機會傳落去啫！」
場地提供：彌敦酒店
第三十二屆香港電影金像獎最佳男配角入圍名單
鄭中基
《低俗喜劇》
廖啟智
《消失的子彈》
林家棟
《寒戰》
杜汶澤
《DIVA華麗之後》
萬梓良
《懸紅》
想睇更多首輪猛片介紹同預告片?《一台戲》為你網羅最新電影介紹及影評↓↓↓↓
http://hk.movies.nextmedia.com/