【特稿】
即將推出魚翅Q嘜認證的組織，日前印製一批通告，內容總結CITES決議及業界態度，供「海味街」商戶及食肆張貼。德成海味總經理陳沛傑，贊成Q嘜認證可以提供清晰指引；但有不願上鏡的海味店東，指反對食翅成為潮流，「根本一刀切話食翅唔環保」，個人看淡計劃。
魚翅認證亦以食肆為推行對象。米芝蓮一星級食府「桃花源小廚」東主黎有甜說：「呢樣嘢早做十年，我哋唔使成日好似賣賊贓咁，鬼鬼祟祟。」該食府魚翅菜式佔菜牌一版，黎指加入認證後增至兩版。
黎有甜表示，絕非如環保團體所指摘，為賣翅暴利而懶理生態：「如果計毛利，我賣馬拉糕仲好，2元成本賣30元；一碗魚翅300元，成本150元，邊個毛利高？」他表示堅持以魚翅做菜，只為承傳該廚藝文化。
而曾因在電視節目介紹魚翅、被環團圍攻的「幟哥」黃永幟被問及會否加盟認證時稱，經上次風波後存在顧慮，且隨着中央政府肅貪，他在上海開設的兩間高級食府，食用鮑魚、魚翅等貴價食材已暴跌四成，而本地海味乾貨批發商的貴價海味更滯銷，跌價約15%。
《蘋果》記者