上個星期進入放榜高峯期，超過300間公司逐一公佈業績。一年兩度放榜排洪期，總會出現一個怪現象，就是業績好，越早出。PR驚死記者唔知，打埋電話溫馨提示你。相反，業績差、有古怪公司，一般鍾意慢條斯理，在晚上11點死線前始上載業績通告。原因就是睇死報紙截稿寫唔切，就算有衰嘢，都做唔到大。
低調公佈避傳媒批判
不過，這種自欺欺人、隱惡揚善的玩法，在網絡爆炸的年代，已經完全不管用，間接推使衰公司加快死亡。股榮統計過去一個星期數據，超過八成上市公司選擇收市後始公佈業績，數目約244間。有趣的是，由4點港股收市到晚上11點公佈業績期間，竟然有近一半（約45%或110間），揀選在晚上10點或以後始披露，更誇張的，是最後15分鐘「報到」的有51間，佔收市後數目達20%。
上市公司通常早於半個月前，已預告公佈業績日期，核數師亦一般早一星期前，已審核好資料交予公司。因此，上市公司絕對有能力在派成績表當日一早發佈。
據了解，現時逾九成通告皆採取先發佈、後審閱的直通方式發出，時間性完全由公司主導，熟早熟晚亦由公司話事，故此與其說他們遲出是因為時間緊逼，我傾向相信他們要低調行事，避開傳媒批判目光。
越遲公佈，業績上亦多有沙石。過去一周有11間公司業績，在核數師報告中附帶保留意見或修訂意見，當中10間竟然不約而同，選擇晚上10點甚至臨截通告前上載至港交所（388）網站，可謂用心良苦。
難逃網民漏夜狂插
究竟早出或遲出，對股價影響如何。答案是早出冇着數，遲出亦唔見得好。上周四有六間公佈於四至五點放榜，翌日股價三升三跌，純粹視乎業績好壞。至於晚上十點以後放榜的共有17間，撇除2隻停牌，翌日股價下跌的有9間，上升的只有4間，下跌的比例明顯較上升多。
與大市比較，上周收市後放榜的股份（不計周五）共157隻，跑輸恒指（跌1.8%）的超過100隻，當中有三分二屬最後一小時始放榜的股份，表現明顯遜色。
在資訊爆炸的時代，網上資訊散播的威力，已超越傳統媒體。業績衰避得過報紙報道，卻避唔過網民徹夜狂插，一經網絡發酵，在深夜冇人解畫下，事情可能演變成另一個版本。
最後，股榮向今個星期超過500間放榜公司作出溫馨提示：醜婦終須見家翁，唔好阻住我收工。
股榮